ബഹ്റൈനിൽ ഗതാഗതക്കുരുക്ക് ലഘൂകരിക്കുന്നതിനായി പ്രത്യേക പദ്ധതിയായ സ്മാർട്ട് കാർ-ഷെയറിങ് സംവിധാനത്തിന് ക്യാപിറ്റൽ ട്രസ്റ്റീസ് ബോർഡ് അംഗീകാരം. ഒരേ ദിശയിലേക്കു യാത്ര ചെയുന്ന ഒന്നിലധികം ഉപഭോക്താക്കൾക്ക് പദ്ധതിയുടെ പ്രയോജനം ലഭ്യമാകും. ലൈവ് മാപ്പുകളും തത്സമയ അപ്ഡേറ്റുകളും ഉപയോഗിച്ച്, യാത്രാ വിവരങ്ങൾ ആപ്പിൽ ലഭ്യമാകും.
ബഹ്റൈനിൽ മാത്രമായി വികസിപ്പിച്ച ഒരു മൊബൈൽ ആപ്ലിക്കേഷനെ അടിസ്ഥാനമാക്കിയാണ് ഈ സംവിധാനം പ്രവർത്തിക്കുക. ഒരേ ദിശയിലേക്കു പോകുന്നവർക്കാണ് പുതിയ സംവിധാനം കൊണ്ട് പ്രയോജനം ലഭിക്കുന്നത്. ഏതെങ്കിലും പ്രത്യേക സ്ഥലത്തേക്കോ ഒരേ ദിശയിലുള്ള ജോലിസ്ഥലങ്ങളിലേക്കും സർവകലാശാലകളിലേക്കും പോകുന്ന ആളുകൾക്ക് അവരുടെ ദിവസേനയുള്ള യാത്രകൾ പരസ്പരം പങ്കുവെക്കാൻ സാധിക്കും. ലൈവ് മാപ്പുകളും തത്സമയ അപ്ഡേറ്റുകളും ഉപയോഗിച്ച്, യാത്ര ചെയ്യുന്നവരുടെ സ്ഥലവും സമയവും അനുസരിച്ച് ഡ്രൈവർമാരെയും യാത്രക്കാരെയും ആപ്പ് രേഖപ്പെടുത്തും. ഇന്ധനച്ചെലവ് പങ്കുവെക്കുന്നതിനുള്ള സംവിധാനവും ഇതിലുണ്ടാകും. ഒന്നിൽ കൂടുതൽ ഉപയോക്താക്കളെ സൃഷ്ടിച്ച് പദ്ധതി സുഗമമായി നടപ്പാക്കാനാണ് പ്രവർത്തന ലക്ഷ്യം.
ആദ്യ ഘട്ടത്തിൽ വൻകിട വാണിജ്യ, ഓഫിസ് മേഖലകളിലെ ജീവനക്കാർ, സ്വകാര്യ സർവകലാശാലകളിലെയും യൂണിവേഴ്സിറ്റി ഓഫ് ബഹ്റൈൻ, ബിഐബിഎഫ് പോലുള്ള സ്ഥാപനങ്ങളിലെയും വിദ്യാർഥികൾ, ജോലി സമയവും റൂട്ടുകളും നിശ്ചിതമായിട്ടുള്ള സർക്കാർ ജീവനക്കാർ, ബാങ്ക് ജീവനക്കാർ എന്നിവരെയാണ് ലക്ഷ്യമിടുന്നത്. ഇത് ചെലവ് കുറഞ്ഞ യാത്രാരീതിക്ക് തുടക്കം കുറിക്കുമെന്നാണ് പ്രതീക്ഷിക്കുന്നത്. വിശദമായ ചർച്ചകൾക്ക് ശേഷം, ഏകകണ്ഠമായി അംഗീകരിച്ച ഈ നിർദേശം ഇപ്പോൾ അവലോകനത്തിനായി മുനിസിപ്പാലിറ്റി കാര്യ-കൃഷി മന്ത്രി വഈൽ അൽ മുബാറക്കിനും തുടർന്ന് ഗതാഗത-ടെലികമ്യൂണിക്കേഷൻസ് മന്ത്രി ശൈ ഖ്ഡോ. അബ്ദുല്ല ബിൻ അഹമ്മദ് ആൽ ഖലീഫക്കും കൈമാറിയിട്ടുണ്ട്. ബോർഡ് അംഗം ഡോ. ബഷാർ അഹമ്മദി സമർപ്പിച്ച സ്മാർട്ട്, സുസ്ഥിര പങ്കാളിത്ത ഗതാഗതത്തിനുള്ള ഈ നിർദേശം തലസ്ഥാനത്തിൻ്റെ വിശാലമായ ഗതാഗത പദ്ധതികളിൽ ഉൾപ്പെടുത്തും.
Content Highlights: Bahrain Approves Smart Car-Sharing to Ease Traffic Congestion